想簡簡單單為身體補充能量,大家可以揀「花生醬香蕉多士」。
麵包,含有澱粉質,可以為身體提供能量。雖然麵包陷阱多籮籮,但係每次食一塊白麵包,其實無傷大雅。唔駛下下都全麥嘅。
如果想知其中介紹嘅一款較有營養嘅包包,可以試下呢一款:
https://www.askmandywong.com/2018/06/10/高纖crumpets/
香蕉,水果嘅一種,所以有豐富纖維。一條中型香蕉已經有3克纖維以上,係最方便加纖維嘅生果!而且含有果寡糖,屬益生元嘅一種,有助提高益生菌嘅功效。
花生醬,千祈唔好因為佢熱量高而覺得唔食得。花生醬含有好高靚油脂,尤其係好多時被人忽略嘅單元不飽和脂肪,有利心臟健康㗎!而且,花生醬都有蛋白質,我特別鍾意做完運動,大大匙去塗麵包,或者加入麥皮到食。
食得有營養,其實唔駛太花巧。花生醬、香蕉、麵包;三樣都係平凡到不能再平凡嘅食物。但三者加起來,卻變成營養豐富嘅下午茶/早餐啦。
順帶一提,花生醬都有啲中伏位,最緊要了解下你買嗰款花生醬:
1. 花生含量有幾高
2. 有無加入額外油份
3. 有無加入額外糖份
4. 有無不必要添加劑

 

Leave a reply