Ask Mandy Wong

一個人容唔容易瘦,其實都同好多因素有關:年紀、生活習慣、新陳代謝率、壓力因素等等都有關。如果以前曾經減錯肥,其實都會有影響平台期,難減磅!如果體重曾經上上落落,幾個月減到十幾磅,但有好快又反彈番,就已經代表減錯肥啦!真正嘅減肥,係唔會咁易反彈!

加上,如果本身唔係屬於肥,只係偏重嘅情況,而且平時飲食都OK節制,我就殘忍少少話你知,係比一般有’’qouta’’嘅朋友仔難減,但難,唔代表減唔到。平台期唔會一世,有心就減到。最緊要係識揀同識食,身體自然就識瘦!

Keep Fit 同落磅,其實都係睇熱量同營養攝取。出街食嘢唔一定係會食肥人,而自己煮嘢食唔一定會令人瘦。比個例子大家認識下先:

如果你出街食嘅早餐係雞扒(去皮)米粉配熱檸水,但係屋企自己煎兩片餐肉配丁麵再加杯三合一;咁樣嘅話出街食早餐只有300幾千卡熱量,而脂肪攝取可以維持係1-2茶匙,再有接近3份蛋白質; 相反,自己整嘅唔健康早餐熱量有成600千卡以上,攝取起碼5茶匙油分,而且蛋白質攝取係唔足夠㗎!所以出街食,只要識揀識食,依然無問題!

「卡路里」只反映食物嘅熱量,並不包含食物中嘅營養素。就好似一碗飯有200千卡,而一包薯片又有200千卡,如果只睇「卡路里」,食薯片同食飯一樣。但事實上,飯主要含有碳水化合物,可以為身體提供能量;但薯片卻內含脂肪,一旦攝取過量,就好難消脂。所以,買野食我反而建議大家先睇食物成份表,了解食物中的製造成份。

要FIT,主要係要食得醒、食得精,而唔係食得少。「食得少」,唔夠飽反而會增加「大吃」、「亂吃」嘅情況;相反,識揀識食,唔駛減份量,可以食得好飽,但熱量攝取仍然可以低。除咗要留意食材特性,烹調方法、醬汁選取同樣重要。好味、有營同修身都可以並存!

唔少人以為出得汗多,又或者做運動做到肌肉酸軟,就係代表消脂。其實係大錯特錯!

人體要保持約37oC嘅體溫先可以運作正常。當運動而令體溫上升,身體就要散熱才可回落到正常人體體溫。而這個降溫的嘅機制,就係透過排汗。所以,出汗唔等於消脂!

而係無氧運動下製造能量,如跑步嘅頭數分鐘、重覆舉啞鈴嘅動作等,都會令肌肉產生乳酸,令肌肉又酸又軟,但這亦唔代表身體消耗咗脂肪。

有咩想問營養師?