今次嘅沙律,可謂懶人之作。
海藻係乾貨,浸浸水﹐發大佢,加埋雪櫃有嘅青瓜仔同埋滑豆腐,就攪點啦!
由於係包裝海藻沙律(去日本時大手入貨),入面已有「無油」調味包,唔駛自己調較味道。
不過,我略嫌味濃,所以自行加多咗海藻分量,又加咗溫室青瓜令到味道更清新,同時,額外加入嘅滑豆腐就可以增加蛋白質。
海藻屬海洋性植物,蘊含豐富礦物質,手上嗰包含鐵量已有1.6毫克鐵質。而且,唔好睇少海藻嘅纖維含量,唔計我自己加料,都有5.3克纖維啦!
一大兜【豆腐海藻青瓜沙律】,用上200克滑豆腐、加入2條溫室青瓜,熱量大約只有120千卡,含近10克蛋白質。
不過,提提你,即使低脂、低卡、有蛋白質都好,都唔可以餐餐食,同埋要配合其他飽肚有營食物,咁先夠均衡!

Leave a reply