好多人以為「麵包」係輕食,早餐食包、午餐食包、甚至有時晚餐都揀麵包。點知揀錯麵包分分鐘仲肥過食飯,脂肪攝取多過食飯10倍!
唔好以為麵包無餡就代表健康,掉以輕心。
加入牛油、忌廉、全脂奶等,原來無餡麵包都可以好肥!
今次特別係市面上搵咗五款常見無餡麵包做比較。
有麵包每100克已有3茶匙油份啦!

 

丹麥酥方包
丹麥酥方包結合丹麥酥同白麵包,外層係酥皮,都估到會用上牛油,而且牛油分量應該唔少!
排包
無餡排包比人感覺似甜味嘅白麵包,但一個不留神,原來排包含有牛奶、砂糖、忌廉同牛油,樣樣熱量都唔低!食慣排包可能要改改口啦!
北海道3.7牛乳方包
叫得牛乳方包,都必定會用上全脂奶製作。如果再加上忌廉,都知道脂肪含量唔會少得去邊!
純味軟包
以為軟軟熟熟,又寫明係純味,即係會淡口啦,點知成份排第二係牛油,而排第三就係煉奶。當中含有嘅奶脂,大家當然估到啦~
牛油餐包
買餐包最好望望牛油/植物油係成份表中排第幾。不過叫得牛油餐包,牛油份量可能都唔少。除咗小麥麵粉同水,牛油成份排第三啦!
再講多一次啦~
白飯同麵包相比,好多時食飯反而無乜脂肪㗎!

撰自《飲食陷阱2- 30個要靚要Fit必備的食物營養知識》

Leave a reply